Важноста за демократско спроведување на процесот и потребата од висока одговорност од страна на сите субјекти во државата, за да се осигура изјаснувањето на граѓаните, било тема на средбата меѓу премиерот Зоран Заев и Јан Петерсен, шеф на набљудувачката мисија на ОБСЕ/ОДИХР.
-Посветени сме да спроведеме комплетно регуларен, транспаретен и доверлив процес – рече премиерот Заев.
Тој посочи дека во таа насока, кампањата за референдумот е едукативна и е првенствено насочена кон објаснување на договорот од Преспа и од придобивките од евро-атлантските интеграции, како и кон мотивација на граѓаните, каков став и да имаат, да излезат и да го изразат на претстојниот референдум.
-Референдумот е можност граѓаните да го изразат својот став, но исто така укажуваме дека изјаснувањето е граѓанска должност на секој човек со право на глас, бидејќи се работи за добрата иднина на државата – рече Заев.
Тој соопшти дека големото мнозинство граѓани во Македонија, уште од прогласувањето на независноста на државата се определени за интеграција на Македонија во ЕУ и во НАТО и изрази очекување дека оваа определба ќе се одрази на референдумот.
Заев додаде дека предреферендумската атмосфера во државата е пријатна и рече дека очекува вклучување и на опозицијата, во функција на остварувањето на стратешките државни цели и на интересот на граѓаните за просперитетна иднина.
На средбата е изразена согласност за важноста на извештајот што ќе го изготви ОБСЕ/ОДИХР за претстојниот референдум, со оглед дека Македонија очекува почеток на преговорите со ЕУ и отворање на поглавјата. А, претставувањето на Република Македонија како држава којашто практикува демократија, како што рече премиерот Заев, е значајно за впечатоците дека земјата се развива во добар правец, низ почитување на европските вредности.
