Младиот Акмади Јаржанов од Казахстан влегол на теренот во Сингапур на мечот помеѓу Јувентус и Тотенхем, за да направи селфи со Кристијано Роналдо. Поради строгите закони на земјата, детето и неговиот татко завршиле во полиција.
Познатиот фудбалер, се чини, воопшто не бил вознемирен од непоканетиот гостин, напротив, се фотографирал со него, зборувал и му дозволил да седи со него и останатите. Меѓутоа, за полицијата тоа не било во ред.
Како што пренесуваат медиумите во Британија, Јаржанов ќе мора да плати висока казна поради упадот на стадионот.
– Го видов момчето како трче по теренот. Сфатив дека сака да се фотографира со Роналдо. Се исплашив дека обезбедувањето ќе го спречи, па му мавнав и го однесов до Кристијано. Кога го видов, не помислив дека станува збор за вознемирување – рекол тренерот на Јувентус, Маурисио Сари.
Од друга страна, детето дало изјава дека Роналдо е неговиот херој:
– Му реков на Кристијано дека сум негов фан и дека доаѓам од Казахстан. Тој ми рече дека ја посетил мојата земја. Ми посака среќа и ми понуди и вода.
По мечот, Акмади со својот татко завршил во полиција. Конзулот од Казахстан реагирал на време, па благодарение на него, младиот навивач поминал без потешки последици.
