„Доаѓаат времиња кога паметниот замолчува, будалата прозборува, а фукарата се збогатува“, овие мисли на нобеловецот Иво Андриќ денеска на крајот од судското рочиште за „Рекет“ ги цитираше првообвинетиот Бојан Јовановски Боки 13-ка.
– Дојде време кога целиот државен врв е свртен против еден, а тоа сум јас во случајот – додаде Јовановски.
На ова обвинителката Вилма Русковска рече:
– Ова фукарата се збогати, мислиш на себе?
На тоа Боки гласно ѝ возврати:
– Срамота, срам да ти е!
На оваа размена на високи тонови претходеше алузијата на Јовановски на воведните зборови на обвинителкта Вилма Русковска во судскиот процес за организаторите на „27 април“.
– Нема да го цитирам Гоце Делчев во оваа судница, ние не сме дораснати за тоа, но затоа ќе цитирам една мисла од нобеловецот Иво Андриќ – рече Јовановски кој беше опоменат од судијката Васка Николовска Масевска да биде пристоен.
На рочиштето за организаторите на крвавиот четврток минатата недела Русковска рече:
– Да ги завршам овие воведни зборови со мисла од големиот Гоце Делчев – „Историјата не памети друг таков пример кога еден ист народ по традиција, јазик и вера се разделува на толку различни страни. Една од друга по туѓа“.
Судијката го опомена Јовановски да не иронизира, а тој продолжи да зборува дека е под тортура во затворот каде што издржува мерка притвор седум месеци досега.
