Авион со 83 британски и 27 државјани на други земји полета од Вухан, жариштето на новиот коронавирус во централна Кина.
Британското Министерство за надворешни работи објави дека авионот ќе слета околу 13 часот.
Потоа ќе продолжи кон Шпанија, каде одговорноста за преостанатите патници ќе ја преземат нивните матични земји.
– Знаеме колку е вознемирувачка ситуацијата за оние што чекаат да го напуштат Вухан. Деноноќно работиме за да обезбедиме безбедно заминување, изјави британскиот министер за надворешни работи – Доминик Раб.
Малку подоцна министерот Мајкл Гов најави дека Велика Британија, доколку е потребно, ќе испрати уште еден авион во Вухан за да евакуира британски граѓани.
– Ако има потреба, ќе го направиме тоа, одговори Гов на прашање од Скај њуз дали Велика Британија ќе испрати друг авион.
Кинеската Национална комисија за здравство објави дека според последните податоци, од новиот коронавирус досега починале 213 луѓе, додека 9.692 се заразени.
Светската здравствена организација вчера прогласи вонредна здравствена состојба поради коронавирусот, откако бројот на болни за една недела се зголеми за повеќе од десет пати.
