Катица Јанева и Специјалното јавно обвинителство (СЈО) се претворија во карикатура, заради понизноста во извршувањето на политичките нарачки, реагираат од ВМРО-ДПМНЕ по денешната прес-конференција на СЈО на која беа презентирани три нови истраги.
Според партијата очекувано е СЈО да се активира во ситуација кога економијата е пред колапс, кога Зоран Заев и СДСМ се исплашени од јавноста поради носењето на Законот за јазиците, кога се тргува со националните интереси во преговорите со Грција.
„Никој веќе не верува во нивната професионалност и неселективност. Затоа Катица Јанева и СЈО продолжуваат политички да конструираат случаи без никаква правна основа. Јавноста мора да биде дефокусирана од целиот хаос што се случува во државата. Затоа се отвораат случаи за договори потпишани од Амбасадорот на ЕУ во Скопје или закони изгласани во Собранието“, пишува во реакцијата на ВМРО-ДПМНЕ.
Инаку, трите нови истраги на СЈО се однесуваат на пропаднатиот попис во 2011 година – истрагата е со кодно име „Попис“, на продажбата на државно и општинско земјиште кај Македонски Брод – случајот е насловен како „Моќник“, како и истрага за тендерот за автопатот Демир Капија-Смоквица и перењето пари преку него – кодното име на предметот е „Актор“.
