Неуставниот, неприменлив и штетен закон за двојазичност, Социјалдемократскиот сојуз и ДУИ на сила и шверцерски го истуркаа во Собранието, со флагрантно кршење на законот и деловникот за работа, реагира ВМРО-ДПМНЕ.
– Насилието и кршењето на постапките е одраз на заробена и киднапирана држава од страна на Социјалдемократскиот сојуз, кои што охрабрени од власта која ја имаат се стваат над законите. За ваквото самоволие и газење на демократијата, Социјалдемократскиот сојуз и ДУИ ќе сносат и политичка но и правна одговорност. За Талат Џафери ќе биде покрената и кривична одговорност за непочитување на Уставот и на законите на Република Македонија – вели Орце Ѓорѓиевски.
Додава дека единствено претседателот на државата Ѓорге Иванов не подлегнал на притисоците на Социјалдемократскиот сојуз и ДУИ и застанал во одбрана на Уставот и државните интереси.
– Секој обид да биде погазена и институцијата Претседател, ќе повлече дополнителна одговорност за сторителите. Директорот на Службен весник, доколку се обиде да го објави законот за двојазичност без потпис на претседателот Иванов свесно ќе стори кривично дело „Злоупотреба на службената положба и овластување”. Ова дело не застарува за година, две или три за да може да биде амнестиран од судството на Зоран Заев. Со оглед на тежината на делото и огромните штети по буџетот кои би ги предизвикало незаконското објавување во Службен весник, ставот 5 од членот 353 предвидува затворска казна од најмалку 5 години – вели Ѓорѓиевски.
Потсетува дека Уставниот суд во минатото има утврдено дека е неуставен двојниот потпис на Указот од страна на еден од поранешните претседатели на Собранието кога не е исполнет ниту еден од основите предвидени во член 82 од Уставот.
– Уставот и законите се јасни, Талат Џафери не смее да си дозволи да го потпише законот за двојазичност на местото наменето за потпис на претседателот Иванов. Талат Џафери и да го потпише законот на местото наменето за претседателот тоа нема да биде валидно бидејќи тој не може да го заменува претседателот Иванов кога тој во целост си ја врши својата претседателска функција. Токму затоа директорот на Службен весник смее да си дозволи да го објави законот – вели Ѓорѓиевски.
Тврдат дека без потпишан указ од страна на претседателот на Македонија нема закон, а доколку некој се обиде и се дрзне да го прекрши Уставот ќе сноси и соодветна кривична одговорност. ВМРО-ДПМНЕ повтори дека не го признава овој закон и никогаш нема да го признае.
