Владина делегација предводена од министерката задолжена за странски инвестиции Зорица Апостолска денеска положи цвеќе пред споменикот на депортираните Евреи и пред споменикот на паднатите борци во Народноослободителната борба на Градските гробишта Бутел во Скопје.
Во владината делегација беа и замениците министри за информатичко општество и администрација и за локална самоуправа, Александар Бајдевски и Дејан Павлески.
По повод 75-годишнината од холокаустот на 7 144 македонски Евреи во Втората светска војна, делегации на Владата и на Собранието денеска присуствуваваа и на комеморативните настани во Битола и Штип.
Комеморативната програма ќе продолжи вечер во Македонската филхармонија и утре со симболичен Марш на живите и положување цвеќе на споменикот на 7144-те македонски Евреи во кругот на Империал Тобако ТКС (поранешен Монопол), местото од каде што во март 1943 година биле депортирани кон логорот на смртта Треблинка.
