Заменик претседателот на Владата задолжен за европски прашања, Бујар Османи и Генералниот директор на Шведската агенција за меѓународна развојна соработка (СИДА), Карин Јамтин, денеска во просториите на Секретаријатот за европски прашања ги потпишаа Договорот за развојна соработка помеѓу Република Македонија и Шведска и Договорот за општите услови на развојната соработка помеѓу Република Македонија и Шведска.
– По пауза од шест години, Република Македонија е повторно на Шведската развојна агенда и повторно е помеѓу приоритетните партнер – држави за развојна помош од Шведска – истакна Османи, притоа потенцирајќи дека со потпишувањето на овие Договори се обезбедува формално-правен основ за реализација на развојната соработка помеѓу Република Македонија и Шведска со што Шведска јасно покажува дека е партнер на Република Македонија, во развојна, но и во политичка и економска смисла.
Јамтин изрази јасна поддршка за ревитализирањето на реформските активности за приближување кон Европската Унија и потврди дека Шведска е долгогодишен поддржувач на европската перспектива на Македонија.
– Европската интеграција е клучен процес кој создава околности кои долгорочно ќе влијаат на подобрувањето на животните услови за сите жители на Македонија. Ние сме подготвени да ја подржиме Македонија во предизвиците на нејзиниот пат преку оваа развојна соработка – рече таа.
Со овие Договори се обезбедува пристап за Република Македонија до развојни средства од Шведска во индикативен износ од околу 9 милиони евра за периодот од 2018 до 2020 година. Овие средства ќе се имплементираат преку финансирање на проекти во три приоритетни области, тесно поврзани со процесот на пристапување на Република Македонија во Европската унија и тоа: унапредување на економската интеграција со Европската унија и развој на пазарна економија; зајакнување на демократијата, почитувањето на човековите права и владеење на правото и заштитата на животната средина и намалување на влијанието и подобар одговор на климатските промени.
Главна цел на оваа развојна соработка во претстојниот период ќе биде поддршка на евро-интегративниот процес на Република Македонија, а почетокот на спроведување на конкретни проекти финансирани во рамки на Договорите кои се потпишаа денеска се очекува во текот на оваа година.
