Еден од обвинетите во случајот за насилството во Општина Центар, Милан Андоновски, не се појави на денешното рочиште бидејќи е на боледување од 9 март поради ларингитис – инфекција на гласните жици.
Другите обвинети, меѓу кои и Никола Груевски, Миле Јанакиески и Даниела Рангелова беа присутни во судот.
Адвокатите како доказ приложија и лекарска потврда издадена од матичен лекар по препорака на специјалист од Клиниката за уво, нос и грло. Во неa се препорачува дека Андоновски не треба да има физички напор.
На ова реагираа од Социјалното јавно обвинителство (СЈО) посочувајќи дека на истиот обвинет ова му е трет пат како не се појавува во судница, најпрво не дал образложение, а вториот пат пак било поради здравствени причини.
– Обвинетиот очигледно избегнува да дојде на главната расправа. Заради непречено одвивање на расправата предлагам да му се изрече притвор за да се обезбеди и непречено да се води постапката – рече обвинителката Фатиме Фетаи.
Нејзиниот колега од СЈО Гаврил Бубевски пак рече дека притворот нема да му го попречи лекувањето и оти нигде во лекарската потврда не пишува дека не смее да дојде во судница.
– Овде нема да копаме, па да има физички напор – рече тој, додавајќи дека обвинетиот и во затворот во Шуто Оризару ќе си ги прима амоксиклаците кои, како што рече, ги пијат пола од присутните во судницата.
– Имале можност да извадат некое друго лекарско уверение, барем во него да ставале дека има и температура- посочи Бубевски наведувајќи дека станува збор за очигледно одолговлекување на постапката.
Адвокатот на Андоновски, Димитар Дангов, побара СЈО да не покажуваат нервоза и да не се лутат.
– Да го почитуваме неговиот право на здравствена заштита. Никој во оваа судница нема право да каже дека здравјето не му е нарушено. Ако го прифатите предлогот за притвор стравувам не само за него, туку и за сите граѓани бидејќи боледување ќе биде причина за притвор – рече Дангов.
Судот го одби предлогот на СЈО и поради неисполнети услови, ја откажа главната расправа која треба да продолжи на 3 април.
На денешното рочиште требаше да сведочат поранешниот градоначалник на Центар, Андреј Жерновски и две вработени во општината во 2013 за време на насилните протести.
