Еден од осомничените за силување на малолетничка е вработен како матичар во подрачната единица на Министерството за правда во Гостивар, како што неофицијално дознаваме. Тој, заедно со уште две лица за кои е распишана потерница, сексуално го злоупотребиле 13-годишното девојче, кое е со ментална заостанатост.
Освен спрема вработениот во Министерството, за уште две лица е определен 30-дневен притвор, а двајца осомничени се бараат со потерница.
Како што веќе објавивме, девојче било силувано од петмина, чиј идентитет е познат на Основното јавно обвинителство Гостивар.
– Притворот на осомничените е побаран согласно член 165 од Законот за кривична постапка, а поради постоење опасност од бегство, дека ќе влијаат на сведоци, како и дека постојат можности да го повторат кривичното дело. Судот со Решение го прифати предлогот на обвинителството и на осомничените им определи притвор во времетраење од 30 дена. Како што известивме, во предметот се преземаат дејствија за утврдување на фактите и прибирање на доказен материјал против лица кои злоупотребувале дете на возраст од 13 години. Постојат сомненија дека во вршењето на кривичното дело учествувале повеќе лица, од кои за двајца осомничени веќе постои централен распис за нивно пронаоѓање. Во меѓувреме, обвинителството во соработка со Министерството за внатрешни работи го утврдува идентитетот и на други лица кои биле инволвирани во настанот – соопштија денеска од Основното јавно обвинителство Гостивар.
По наредба на обвинителот, детето е згрижено од Центарот за социјални работи во Гостивар.
Надлежниот јавен обвинител од Основното јавно обвинителство Гостивар поднесе предлог до судија на претходна постапка во Основниот суд Гостивар, за определување мерка притвор за осомничените за кои постои сомнение дека во повеќе наврати извршиле кривично дело Полов напад врз дете кое не наполнило 14 години од член 188 став 1 во врска со член 45 од Кривичниот законик.
