Изостанувањето на честитка од американскиот претседател Доналд Трамп по повод изборната победа на неговиот руски колега Владимир Путин не е непријателски чекор, изјави денеска портпаролот на Кремљ, Дмитриј Песков.
– На тоа не треба да се гледа како на непријателски чекор. Путин останува отворен за нормализација на односите со американските партнери онаму каде има интерес и каде е важно. Претседателот доби многу честитки од странски лидери. Некои можеби не можеле телефонски да се јават поради згуснатиот распоред, а некои од други причини – истакна Песков додавајќи „Утрото е попаметно од вечерта“.
Портпаролот на Стејт департментот Хуган Гидли синоќа соопшти дека сѐ уште не е закажан телефонски разговор меѓу Трамп и Путин со цел американскиот претседател да му честита на реизборот на својот руски колега.
На прашањето дали Белата куќа смета дека изборите во Русија биле слободни и фер, портпаролот кусо одговори: „Не сме изненадени од резултатот од изборите“.
– Ќе работиме на култивирање на односите со Русија и ќе спроведуваме казнени мерки кога Русија ќе се закани на нашите интереси. Сепак, ќе бараме области да работиме заедно кога тоа ќе служи на нашите интереси – појасни Гидли.
