Десетици компании лани во Кина ја искористија можноста за изнајмување велосипеди, што ги преплави и онака густо населените градови, кои пак, се покажаа неподготвени за сите последици од овој добронамерен еколошки потег на кинеските власти.
Имено, изнајмувачите почнаа да ги оставаат велосипедите насекаде. Бидејќи не се нивни, тие не ги ни враќаат по користењето, па така остануваат на улица и по неколку дена. Поради тоа улиците се полнат со шарените превозни средства (за „една употреба“), кои пак, во густиот сообраќај често и страдаат. Затоа градските власти мораат да определат и места за собирање на неупотребливите велосипеди.
Кинезите добија специјални „депонии за велосипеди“, што оддалеку можеби изгледаат шарено и привлечно за око, но нивниот зголемен број не ветува ништо добро.
