Агенцијата за аудио и аудиовизуелни медиумски услуги (АВМУ), најмногу пари во 2018 планира да потроши за плати – 35 отсто од вкупно планираните расходи за годинава. Покрај нив, 7 отсто испланирала за надоместоци за членовите на Советот, за интелектуални услуги ќе потроши речиси 16 отсто, а со 6,5 отсто од вкупните расходи во текот на оваа година ќе враќа кредит.
Кога се во прашање приходите односно парите кои ќе ги собере АВМУ во текот на 2018-та година, вкупната сума изнесува 114.725.000. Тоа е за над 9 милиони денари помалку од лани.
Најголем дел – 46,7 отсто ќе ги инкасира од медиумите за дозволите за работа, додека од државниот буџет ќе земе за нијанса помалку, 46 отсто.
Анализата на приходите и расходите на Агенцијата за медиуми, е дел од Петтиот мониторинг извештај за работата на АВМУ и Агенцијата за електронски комуникации (АЕК), кој се однесува на последниот квартал од лани (октомври-декември).
Мониторингот се однесува и на транспарентноста, независноста и ефикасноста и на јавниот интерес.
Извршната директорка на НВО Инфоцентар, Билјана Бејкова, која е и еден од авторите на извештајот, посочи дека АВМУ покажала солидно ниво на транспарентност, промовирала тријазична интернет-страница за медиумска писменост, но забележа дела се дони со подготовката на новата стратегија за развој на аудио и аудиовизуелната дејност.
Една од причините, како што рече таа, е изборниот циклус во 2017, па стратегијата остануа приоритетна задача за оваа година.
На настанот се дискутираше и за новиот закон за медиуми, за којшто заврши јавната расправа и сега е во собраниска процедура.
Забелешките на АВМУ, кои меѓу другото се однесувале за кадровските промени и финансирањето, не биле земени предвид.
Добро е, посочија на презентацијата, тоа што се дозволи постојните претседател и членови на Советот да можат да поднесат кандидатури и за новиот избор кој треба да следува според новите законски прописи.
Извршниот директор на Центарот за развој на медиумите, Дејан Георгиевски, посочи дека е добро што конечно законот ќе влезе во Парламентот и ќе се добие барем нешто, но нагласи оти е потребно да се продолжи со реформи затоа што една од главните цели е на крај да се добие вистинско регулаторно тело кое треба да биде единствено што ќе носи одлуки.
Презентацијата на извештајот за мониторингот на АЕК и АВМУ ја организираа Евротинк – Центар за европски стратегии, НВО Инфоцентар, Транспарентност Македонија и Хелсиншкиот комитет за човекови права.
