Собранието вчера, без поддршка од ЛДП ги усвои измените во даночниот систем со воведување на прогресивен данок и оданочување на доходот од закуп, подзакуп, дивиденди, капитални добивки, игри на среќи и друг доход да се врши со примена на единствена даночна стапка од 15 отсто, соопшти ЛДП.
„Оваа политика беше најавена во програмата на Владата, но е спротивна на долгогодишните програмски залагања на ЛДП за рамен данок и пониски даночни стапки. Заедно со бизнис заедницата, со претприемачите, со информатичарите, со уметниците, со лекарите, со професирите, со креативните творци во нашето општество укажувавме дека ова е погрешен чекор. Мнозинство во коалицијата денес направи грешка“, пишува во соопштението.
Оттаму додаваат дека ќе продолжат да се борат за нивните либерални постулати.
„Македонија мора да биде конкурентна, Македонија мора да стимулира креативност, Македонија мора да биде привлечна за странски инвестиции. Не смееме да дозволиме одлевање на капиталот и инвестициите од Македонија, особено во соседните земји кои нудат поконкурентни услови. Ќе ги следиме економските показатели и веќе наредната година кога ќе се увиди дека денешниот чекор е непродуктивен, ќе инсистираме, Собранието да ја врати политиката на рамен данок и на ниски оданочувања“, наведуваат од ЛДП.
