Во Кривичниот суд во Скопје продолжува судњето за случувањата во Собранието на 27 април минатата година.
Случајот се наоѓа во доказна постапка и изнесување на докази предложени од одбраната. Денеска своја одбрана пред судот треба да дава обвинетата Елена Доцевска-Божиновска. Таа има повикано четворица сведоци, а исказ ќе дава и самата таа.
Потоа, се очекува судењето да продолжи со изведување на писмени докази односно гледање видео снимки предложени од одбраната на други обвинети, меѓу кои актерот Владо Јовановски и полицаецот од собраниското обезбедување Абдулфета Алими.
На минатото рочиште исказ пред судот дадоа обвинетите Горан Ѓошевски, началникот на обезбедувањето на Трајко Вељановски, и Мунир Пепиќ, вработен во Агенцијата за разузнавање. Беа сослушани и неколку сведоци, предложени од одбраната, меѓу кои и пратеникот Влатко Ѓорчев.
Судскиот процес го води судијката Добрила Кацарска, а застапници на обвинението се Вилма Русковска и Ивана Трајчевска.
За случувањата во Собранието на 27 април 2017 година обвинети се вкупно 33 лица, од кои 31 лице за терористичко загрозување на уставниот поредок на државата и двајца за поттикнување. Претходно поради влошена здравствена состојба на обвинетиот Сашко Марковски постапката за него беше одвоена и треба да продолжи по еден месец.
Меѓу обвинетите се повеќе пратеници, вработени во МВР и собраниското обезбедување, уметници. Тие пред Судот кажаа дека го разбираат обвинението, но не се чувствуваат за виновни.
На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.
ФОТО: EPA/GEORGI LICOVSKI
