Пратеникот Антонио Милошоски на денешната седница на Собранието го праша премиерот Зоран Заев колку е задоволен од спроведувањето на најавените инвестиции за влегување во Македонија на две големи светски компании – Фејсбук и Гугл.
Милошоски на седницата за пратенички прашања потести дека вакво ветување Заев дал во телевизиска емисија во септември лани, а дека подоцна, односно на 19 септември 2017 година остварил и средба со еден од првите луѓе, извршниот директор на Гугл, Џерад Коен на која ги презентирал условите за инвестирање во земјава.
Премиерот Заев одговори дека инвестициите на Фејсбук и Гугл се посакувани во секоја земја, но дека тие компании ги следат случувањата и веројатно очекуваат да имаат безбедна иднина со влегувањето на Македонија во НАТО и ЕУ.
– Ако Македонија ги заокружи политичките процеси и тоа се потврди преку уставните измени и стане извесно членството на НАТО, кое е важно за вакви компании за да ја реализираат својата инвестиција сите заедно ќе му помогнеме на бордот директори да донесе позитивна одлука за инвестицијата во Македонија – одговори Заев.
Пратеникот рече дека не е задоволен од одговорот и го обвини премиерот дека дава лажни ветувања, потсетувајќи го дека кога го дал ова ветување не кажал дека Фејсбук и Гугл ќе влезат во земјава, откако ќе станеме членка на НАТО.
– Вработување на нови 50 луѓе во Владата за да ви ставаат лајкови на вашите постови е единстевната инвестиција што сте ја направиле од Фејсбук. Најавувате дека Владата е во напредна фаза во преговорте со ФБ и Гугл во септември 2017. Тоа значи дека сите ветувања за странски инвестиции биле лажни – забележа Милошоски.
