Скопското обвинителство отвори истрага против мајката која заедно со нејзиното бебе летово беше примена во Ургентниот центар во Скопје. Бебето имаше хематом на главата и скршеници на двете нозе.
Истрагата обвинителството ја отвори против мајката за кривично дело запуштање и малтретирање дете.
„Постои основано сомнение дека осомничената, во периодот од 15.06.2018 до 06.07.2018 година, во повеќе наврати, со грубо запоставување на својата должност за грижа и воспитување како родител, го запуштила своето дете и како резултат на тоа кај детето-жртва настапила тешка телесна повреда, со која бил доведен во опасност неговиот живот. Во временски период додека таткото на детето родено во мај 2017 година се наоѓал на издржување на казна затвор, мајката не му пружила соодветна родителска грижа на детето, повремено го оставала само или го препуштала на грижа на други лица без притоа да внимава на сигурноста, безбедноста и потребите на детето“, наведуваат од обвинителството.
Како резултат на ваквиот третман, детето се здобило со тешки телесни повреди на телото и главата со кои бил доведен во опасност неговиот живот и на 7 јули 2018 година било примено на Ургентниот центар при комплексот клиники „Мајка Тереза“ во Скопје.
Во рамки на предистражната постапка, надлежниот обвинител сослушал повеќе сведоци и ја испитал осомничената, издал и наредба за утврдување на психијатриската состојба на мајката, како и наредба за вештачење на видот и карактерот на повредите кај детето.
„До овој момент не е утврден идентитетот на лицето што директно ги нанело повредите кај детето, но надлежниот јавен обвинител и натаму презема дејствија за утврдување на фактите и доколку се утврди кривична одговорност на конкретен сторител и против него ќе биде поведена постапка. Од страна на Центарот за социјални работи на детето му е одреден привремен старател и тоа е згрижено во Домот за доенчиња во Битола“, соопштија од обвинителството.
