Сериозни инциденти се случија доцна синоќа, по завршувањето на протестниот марш во Атина за одбелужвањето на 45 годишнината од бунтот против воената хунта.
Масовниот протест од Политехничкиот факултет, кој е симбол на студентскиот бунт во 1973 година, до Амбасадата на САД во Атина заврши мирно, но потоа следеа инциденти во атинската населба Ексархија, што важи за собиралиште на анархистите, но и населба каде што се наоѓа Политехничкиот факултет.
Групи маскирани лица ја нападнаа полицијата со молотови коктели, дрва, камења, а палеа и канти за отпадоци. Специјалните полициски сили одговорија со солзавец, шок бомби и топови со вода, јави дописничката на МИА од Атина.
Во инцидентите што траеа речиси четири часа, предизвикана е материјална штета, полицијата уапси 19 лица, а неофицијално повредени се двајца полицајци, додека пак група маскирани лица го запали грчкото знаме.
Нападите кон полицијата со молотови коктели и пиротехнички материјали имаше и од објектот на Политехничкиот факултет во кој се наоѓаше поголема група млади лица.
Полицијата фрлаше солзавец и шок бомби, но одговори и со топови вода од специјалното возило на грчката полиција.
Претходно,на крајот од протесниот марш, инциденти се случија и во близина на централната зграда на грчката полиција, каде што беа приведени осум лица.
Во маршот од Политехничкиот факултет до американската Амбасада учествуваа и министри и пратеници од СИРИЗА, меѓу кои и министерот за дигитална политика Никос Папас, алтернативниот министер за одбрана Панајотис Ригас и секретарот на партијата Панос Скурлетис. Во моментите кога пристигнуваа пред Амбасадата на САД, непознати лица, кон нив фрлија шишиња вода, кафиња во пластични чаши и јајца, но страстите брзо се смирија.
Во Солун и Патра, исто како и во Атина, се случија инциденти со групи маскирани лица, при протестите за одбележување на 45-годишнината од студентскиот бунт.
Во Солун, според локалните медиуми, по маршот, маскираните лица го запалиле знамето на Европската Унија и се судриле со полицијата пред Политехничкиот факултет, а била предизвикана и материјална штета на продавници.
Слична била ситуацијата и во Патра, со молотови коктели и солзавец во инцидентите меѓу маскираните лица и полицијата, а полицијата привела најмалку пет лица.
Речиси секоја година на 17 ноември, денот кога се одбележува годишнината од студентскиот бунт против хунтата, протесниот марш завршува мирно, но следуваат инциденти меѓу маскирани лица, кои можеби се анархисти и полицијата.
Фото: МИА
