Како десничарска партија, Обединети за Македонија бара ВМРО да влезе во преамбулата на Уставот, но и дека мора да се забрани името ВМРО во имињата на партиите. ВМРО како масовно, национално ослободително движење е првата организирана формација која ја издигнала идејата за независна Македонија за сите народности во неа. Затоа, ВМРО е организација која припаѓа подеднакво на сите граѓани на Македонија и треба сите да нѐ обединува – соопштија денеска од Обединети за Македонија.
Како што нагласуваат од оваа партија, „во нашето партиско име го нема предзнакот ВМРО, но го има во преамбулата во нашиот Статут, за да се оддаде почит кон организацијата која ги обединувала сите етноси во Македонија. Ниту ние, но и ниту една друга партија нема право да го злоупотребува тоа свето име за македонскиот народ“. За тоа, според нив, сведочат и повеќе изјави од минатото:
Според Христо Татарчев, цитираме: „Прифатен еднаш автономниот принцип, ни налагаше да бидеме последователни и во понатамошните решенија и да се избегнува сето она кое би го возбудило тесноградниот национализам кај инородните народи.“
Според Димитар Влахов, цитираме: „Член на организацијата може да биде секој Македонец, од која народност и да е тој и какви и да биле неговите политички сфаќања, само да прима нејзините принципи и се бори за политичката автономија на Македонија“.
-Овој мал дел од многу други изјави од членови на историското ВМРО, јасно ни покажуваат дека историското ВМРО е државотворна организација и ниту една партија нема право да го злоупотребува тоа име. ВМРО е на секој граѓанин на Македонија и кон него треба сите да имаме почит, а не да создава раздор и омраза – соопштија од Обединети за Македонија.
