Ова се заклучоците од координацијата на пратеничката група на опозициската партија, која се одржа во партиското седиште, а вечерва ги соопшти координаторот Никола Мицевски.
-Нема да учествуваме во Коодинативното тело за помирување затоа што сè уште немаме содржина на она што би требало да се случува, и според нас тоа е селективноста во правдата која во изминатиот период ја гледаме. Доколку тоа координативно тело донесе заклучоци, одлука или каков било начин за ослободување или решение на проблемите на сите инволвирани од 27 април, ние како пратеничка група ќе го поддржиме тој процес, одлука, закон или што било, изјави Мицевски по завршувањето на координацијата.
Во однос на нацрт-амандманите за измените на Уставот, кои се на дневен ред в среда на собраниска Комисија за уставни прашања, рече дека пратеничката група на ВМРО-ДПМНЕ ќе настапи со, како што рече, „жестоко разобличување на сите уставни амнадмани и за сето она што се случува во Македонија, а за кое ние како пратеници и како партија реагиравме во изминатиот период“.
– Како пратеници ние во наредниот период ќе дебатираме по однос на амандманите предложени од Владата и сето она што беше кажувано дека ќе биде внесено или нема да биде внесено во амандманите, а сега го гледаме дека е тука или не е тука – додаде координаторот на пратеничката група на ВМРО-ДПМНЕ.
