На фотографијата, која попладнево осамна на еден од нашите портали, се потпретседателот на ВМРО-ДПМНЕ Александар Николовски и Синиша Алексовски, советник на претседателот Ѓорге Иванов, човек чие име често се спомнува кога се говори за руското влијание во Македонија, а се доведува во врска и со движењето „Бојкотирам“.
Вториот човек на ВМРО-ДПМНЕ, најблискиот соработник на лидерот Христијан Мицкоски, и Алексовски, во опуштена атмосфера, разговараат во едно од скопските кафулиња. Порталот што ја објави фотографијата прави разни претпоставки за тоа што е тема на муабетот. Се разбира, содржината на разговорот е приватна работа, но фактот дека се одржала ваква средба, во околности кои се познати, можеби укажува на политички релации за кои ВМРО-ДПМНЕ беше обвинувана деновиве, имено за отворено напуштање на прозападната ориентација.
А можеби и не. Можеби двајцата си разговарале само за мечот Ѓоковиќ – Федерер… Недела, скопски и – сѐ е можно.
