Министерот за надворешни работи Никола Димитров вели дека ситуацијата со преговорите со Грција се менува секојдневно и од тоа зависи оптимизмот за евентуалното решение. Македонија, посочува тој, прави сѐ за да се дојде до достоинствен компромис кој така ќе биде доживеан од двете страни. Не се плашиме, посочува тој, да им погледнеме на проблемите во очи, но не зависи сѐ од нас.
– Не е сѐ во наши раце. Се обидуваме да најдеме решение што ќе ги покрие грижите на двете страни во смисла на дистинкција меѓу државата Македонија и регионот Македонија во Грција, но дистинкција што ќе биде достоинствена и нема да навлезе во идентитетските прашања на двете страни. Две европски држави во 21 век кои споделуваат географски регион Македонија треба и мора да најдат начин како да споделуваат и такви културни наследства, дури и тогаш кога под поимот подразбираат различни работи или ставаат различен акцент – рече Димитров одговарајќи на новинарско прашање на прес-конференцијата со неговиот полски колега Јацек Чапутовиќ.
Ако се суди по она што го направивме со договорот со Бугарија, Додаде Димитров, може да се види дека македонското општество не се плаши да затвора тешки прашања и да им гледа директно в очи на проблемите.
– Ние ќе направиме сѐ што можеме, мене како министер за надворешни работи ми е задача да бидам оптимист дури и тогаш кога сакам повеќе аргументи од оние што денес ги има, меѓутоа ситуацијата и чувството кај мене прво како граѓанин, а потоа како одговорен, односно меѓу одговорните за ова прашање се менува практично дневно – истакна Димитров.
Неговиот полски колега Чапутович се надева дека разговорите меѓу Македонија и Грција, ќе завршат успешно.
– Забележуваме големи гестови од македонска страна, на пример како промената на името на аеродромот, како и подготвеност за дискутирање за прашањето поврзано со името на земјата. Од друга страна забележуваме и очекување на македонската страна да се обрне внимание на одредени прашања поврзани со идентитетот. Ќе видиме како ќе се одвиваат овие разговори, но, сакам да кажам дека одредени очекувања на македонската страна се поврзани со зачувување на државниот идентитет, а тоа е многу важно и треба да биде земено предвид – рече Чапутович.
Шефот на македонската дипломатија не прецизираше кога ќе дојде во Македонија неговиот грчки колега Никос Коѕијас кој треба да ја донесе грчката нацрт спогодба за решавање на спорот.
– Во тек е усогласување меѓу нашето Министерство, тоа на Грција и Канцеларијата на медијаторот Метју Нимиц, во контекст на неколку датуми и следни чекори. Штом тоа се затвори, јас очекувам тоа да биде кон крајот на неделава, синхронизирано, истовремено ќе биде запознаена јавноста и кај нас и кај нив точно за тоа кога претстои таа посета, кој ќе биде следен чекор… – рече Димитров.
Тој додаде дека иако јавноста има потреба да биде запознаена со текот на преговорите, не е добро јавно да се пласираат сите информации.
– Мислам дека колку сме поексплицитни во јавност, толку потешко ќе најдеме заеднички јазик на масата каде што разговараме. И јас постојано ги упатувам тие апели не само кон нас, туку и кон другата страна дека главната концентрација и енергија, сепак, треба да се инвестира во тој процес бидејќи ако повторуваме позиции јавно тие стануваат црвени линии, а со црвени линии не се оди на состанок со другата страна – рече Димитров.
Прашањето за името ќе биде една од главните теми на утрешната средба на Димитров со американскиот помошник државен секретар за Европа и Евроазија, Вес Мичел.
– Мислам дека секако состанокот ќе тргне со тоа прашање. Тоа ќе биде убава прилика да го запознаеме со динамиката во процесот за надминување на разликата околу името – рече Димитров.
Од македонска страна, посочи Димитров, ќе биде поставено и прашањето за шансите Македонија годинава да стане дел од НАТО, за динамиката на одлуките на Самитот на Алијансата во јули оваа година, како и некои други прашања во контекст на перспективите на регионот.
– За нас е убава вест што помошникот на државниот секретар за Европа и Евроазија Велс Мичел доаѓа во Македонија. Нас ни треба тоа внимание и тој ангажман – рече Димитрив.
Тој додаде дека според последните анкети, 80 проценти од граѓаните на РМ го поддржуваат членството во НАТО.
– Јас често во контекст на стратегијата и вклучувањето на Балканот зборувам дека ни треба реформски натпревар. Да се натпреваруваме кој ќе биде поуспешен во судски реформи, борба против корупција, слободни медиуми итн. По аналогија, во делот на билатералните прашања ќе биде убаво со нашите соседи со кои уште имаме разлики, да се натпреваруваме кој ќе биде поевропски, кој ќе покаже разбирање за другите и кој ќе ги има предвид вредностите и принципите на Европа бидејќи токму и во тој контекст се обидуваме да го решиме тоа прашање -рече Димитров.
Фото: МИА
