Немањето средби не е порака за нив. При секоја посета имате определено време и треба да направите избор како најдобро да го искористите времето. Јас сум разговарал со Мицкоски, тој испрати писмо кое јас внимателно го прочитав во кое ги изнесува ставовите на ВМРО-ДПМНЕ. Се сретнав со членови на парламентот, меѓу кои и пратеници на ВМРО-ДПМНЕ, рече американскиот заменик помошник секретар Метју Палмер одговарајќи зошто при неговата денешна посета на Македонија во неговата агенда нема средба со лидерот на опозицијата Христијан Мицкоски и претседателот Ѓорге Иванов.
Палмер не сакаше конкретно да ги коментира ставовите на опозицијата, но нагласи дека САД цврсто ја поддржуваат Преспанската спогодба.
– Задоволни сме со исходот на гласањето. Тоа е глас за иднината и соработуваме тесно со Владата и со сите пратеници кои гласаа за да се спроведе целосно спогодбата, а потоа и Грција да ги исполни своите обврски – одговори високиот американски претставник.
Тој ја потврди поддршката од САД за која рече дека Македонија може да смета како што се движи напред кон зачленувањето во НАТО и отворањето на преговорите со ЕУ.
На средбата со Заев, рече тој, разговарале за Преспанскиот договот, за неговата имплементација, за процесот на интеграција на земјата во НАТО и ЕУ, како и за можностите за натамошна соработка меѓу Македонија и САД.
Ова е втора посета на Палмер на земјава оваа година. Заменик-помошникот државен секретар за европски прашања на САД, последен пат на средби со македонскиот државен врв беше во август годинава.
