Во понеделник, на 8 октомври, во Кривичниот суд во Скопје ќе биде соопштена пресудата за екс министерката за внатрешни работи Гордана Јанкулоска за случајот со набавката на блиндираниот „мерцедес“.
На Јанкулоска прво ѝ се судеше заедно со поранешниот премиер Никола Груевски и екс помошник министер во МВР Ѓоко Поповски, но постапката за неа се раздвои поради бременоста. По породувањето на крајот од август, продолжи судењето.
Делото кое ѝ се става на товар е злоупотреба на службената положба и овластувања.
Таа и нејзините адвокати во завршните зборови побараа ослободителна пресуда, додека обвинителите од СЈО Фатиме Фетаи и Стевчо Донев побараа осудителна.
За Груевски и Поповски Кривичниот суд веќе донесе пресуда со која Груевски доби две, а Поповски шест години и шест месеци затвор. Тие се жалеа до Апелацискиот суд Скопје кој одржа јавна седница по жалбите за првостепената пресуда, но одлука од второстепениот суд и по подолго од еден месец сѐ уште нема.
