Во пресрет на референдумот, атмосферата на терен во однос на нерегуларности и кривични дела е мирна, а од Обвинителството се надеваат дека така ќе остане и во недела на денот на гласање, вели обвинителот Џејлал Бајрами.
Состојбата ја следат обвинители од целата територија на Република Македонија, а специјално за референдумот со одлука на републичкиот јавен обвинител Љубомир Јовески е формирана комисија која работи уште од почетокот на кампањата.
– Задача на оваа комисија е да ги следи евентуалните противправности против кривичните дела против изборите и гласањето. Во комисијата членуваат членови од сите четири Виши јавни обвинителства и еден од ОЈО Скопје и со тоа се покрива цела територија. Дадени се задолженија на денот на гласањето покрај редовните да има и дополнителни дежурства со цел навремено делување ако евентуално има кривични дела. Воспоставена е комуникација со сите обвинителства и со припадниците на МВР кои ќе бидат на терен и ако има некое кривично дело да известат за да може да делуваме и навремено да собереме докази – рече Бајрами.
Исто така, и електронската адреса за потребите на оваа комисија, посочи обвинителот, е отворена и ги повикуваат граѓаните, партиите, невладините организации, домашните и меѓународните институции и сите кои ценат дека има неправилности со организирањето и спроведувањето на гласањето да ги пријават за да може обвинителатвото да постапи.
Бајрами вели дека досега е поднесена само една кривична пријава од страна на една политичка партија за делото поткуп при избори. Пријавата од скопското е препретена до кумановското обвинителство.
Тој не сакаше да одговори за која кривична пријава станува збор, но во јавноста е познато дека ВМРО-ДПМНЕ го пријави премиерот Зоран Заев кој на трибина зборуваше дека бизнисмените треба да го одврзат ќесето и да ги наградат вработените.
Бајрами не даде коментар ниту за наводите од Единствена Македонија дека постои исказ од заштитен сведок и по референдумот наводно се спрема апсење на нејзиниот лидер Јанко Бачев. За одговори ги упати новинарите до прес службите на обвинителството.
