Изградба на интерконективен гасовод за ефикасна испорака на природен гас како дел од соработката за развој на преносните мрежи на природен гас меѓу Македонија и Албанија е договорена денеска, со потпишување на Меморандумот за разбирање меѓу директорите на Македонски енергетски ресурси и АЛБГАЗ од Тирана, Бајрам Реџепи и Арбр Аврами.
На денешното потпишување присуствуваа и министерот за економија Крешник Бектеши и албанскиот министер за енергетика Дамјан Ѓикнури.
– Соработката во областа на природниот гас, верификувана денеска ќе овозможи обезбедување на сигурност и диверзификација на снабдувањето со природен гас. Со ова ќе биде промовирана гасификацијата, испораката на дополнителни количини на природен гас помеѓу двете земји, но и поттикнување на инфраструктурните инвестиции во енергетскиот сектор, како и исполнување на обврските што произлегуваат од Регионалната иницијатива за централно и југоисточно европско поврзување со гас – изјави Бектеши по потпишувањето.
Бектеши изрази и задоволство што изградбата на проектот ТАП на албанска територија е во завршна фаза.
За министерот за енергетика на Албанија Ѓикнури потпишувањето на меморандумот за соработка во сферата на гасификацијата, како дел од енергетиката, е добра основа од која ќе имаат корист двете земји.
– Таквите проекти кои го развиваат енергетскиот пазар треба да се гледаат со голем интерес , бидејќи како соседни земји имаме многу обврски кон Енергетската заедница – рече Ѓикнури.
Министерот за економија Крешник Бектеши денеска престојува во Тирана, во рамки на официјалната посета на Република Албанија.
