Ален Ле Роа, амбасадор на Франција, пријател на Македонија, специјален претставник на Европската Унија за Македонија во 2001 и 2002 година утре доаѓа во Македонија, најави Француската амбасада во Скопје.
Во рамките на својата тогашна мисија, тој ѝ помогна на земјата повторно да ја воспостави меѓуетничкта доверба и да го врати својот углед во Европа.
Беше генерален секретар на Обединетите нации задолжен за мировни операции (2008-2014), како и амбасадор во Италија (2011-2014) и генерален секретар на Европската служба за надворешни работи за периодот од јануари 2015 до август 2016 година.
Тој има долгогодишно искуство за состојбите во регионот, како заменик специјален координатор на ООН во Сараево во 1995 година и префект на Пеќ во периодот 1999 – 2000 година, но исто така и во врска со економските состојби, како директор за економски прашања при Министерството за Надворешни работи (2002-2005).
Во неговата агенда се вклучени серија средби со политички претставници, од мнозинството и од опозицијата, при што амбасадорот ќе има можност да разговара во Скопје и во Тетово за перспективите на земјата при успешен референдум, што е услов за Македонија да направи решавачки чекор на својот европски пат.
Два приема во резиденцијата на Франција ќе бидат организирани во рамките на посетата, еден за членовите на групата за пријателство Франција-Македонија и вториот – по повод одржувањето на Патувачкиот француско-германски универзитет на Балканот, во соработка со Правниот факултет во Скопје и во присуство на министрите за одбрана, правда и образование, како и на професори и студенти.
Амбасадорот Ле Роа ќе се приклучи кон сенаторката од Ивлин и претседател на групата за соработка Франција – Западен Балкан, г-ѓа Марта де Сидрак и кон заменик-претседателот на групата на интерпарламентарна соработка, задолжен за Македонија, сенаторот Арно Базен, на конференцијата во Дипломатската академија при Министерството за надворешни работи каде што ќе се сретне со дипломати, новинари и македонски невладини организации и ќе има можност да разговара пред широка публика за актуелната состојба во земјата.
Франција внимателно ги следи случувањата во Македонија и останува посветена заедно со земјата, во 2018 година, како што беше и во 2001, за да ја придружува на патот на нејзината европска интеграција.
