Одбраната смета дека пратеникот Мухамед Зекири за време на истрагата за 27 април кажал повеќе работи отколку што денеска кажува во неговото сведочење во Кривичниот суд во Скопје.
– Сведокот не лаже туку знае многу повеќе од она што денеска го дава како исказ пред судот – вели еден од адвокатите во одбраната Еленко Миланов.
Тој се обиде да му прочита цитат од неговиот исказ во истрагата на што жестоко реагираше обвинителката Вилма Рускоска.
Судењето тече во тензична атмосфера, во приговорите кои ги даваа обвинителството и одбраната имаше и бурни реакции, а судијката Добрила Кацарска во неколку наврати опоменуваше да не се ремети редот во судницата инаку во спротивно ќе почне да казнува.
Адвокатите сакаат да му го предочат исказот на Зекири кој тој го дал во обвинителството, па судијката даде пауза за судечкиот совет да одлучи дали ќе им дозволи на адвокатите да му го предочат исказот.
