Убеден дека заедно на 30 септември ќе донесеме правилна одлука со која ќе ја обезбедиме иднината на европска Македонија и ќе му порачаме на светот кој силно не поддржува дека сме цврсто определени за интеграција со ЕУ и НАТО, рече вечерва во скопската општина Карпош премиерот и претседател на СДСМ Зоран Заев на граѓанската трибина организирана од коалицијата „Излези за европска Македонија“.
Зачленувањето во НАТО, според Заев, ќе донесе нови и големи директни странски инвестиции во економијата во Македонија.
– Сите комори во државава се заедно со оваа коалиција заради тоа што бизнисите имаат иднина во европскиот пазар од 500 милиони потрошувачи што е 250 пати поголем од македонскиот пазар. Синдикатите се сите со нас затоа што знаат дека покрај перспективите на нашата земја ќе имаат поголеми работнички права, поголеми плати и подостоинствени работници – рече Заев.
Македонија до сега, како што истакна Заев, добива 90 милиони евра грантови на годишно ниво.
– Тоа се 260 илјади евра дневно помош од ЕУ за граѓаните и институциите во Македонија. Секоја година имаме 18 милиони евра директна поддршка за правосудството и за безбедноста во државата, 18 милиони евра годишно имаме за транспорт, односно за патишта, железници, тунели и мостови, 8,5 милиони евра годишно добиваме за граничните премини, 15 милиони евра добиваме поддршка за земјоделството – истакна Заев.
Во контекст на тоа, додаде дека секаде провејуваат европски пари затоа што Европа е искрен пријател на Македонија.
– НАТО и ЕУ, покрај безбедноста значат и економија. Убеден сум дека со ваквите чекори ја заокружуваме и најважната причина – економски раст и развој, обезбеденост на целокупните перспективи на нашата земја. Да направиме конечно после 27 години квантен скок… – рече Заев.
Зборувајќи за договорите со Бугарија и Грција, премиерот Заев истакна дека преку овие договори веќе немаме проблеми со признавањето на нашата земја, народот, идентитетот и јазикот.
– Македонија денеска со сите свои соседни е пријател. Добивме пријатели кои убеден сум дека силно ќе не поддржат на нашиот пат и определбата за европска Македонија – потенцира Заев.
Тој посочи дека добиваме иднина и им гарантираме на нашите деца перспективи.
– Сега е моментот да застанеме заедно и да донесеме одлука за европска Македонија. Ова не е за партиите, ова е за нашата Македонија и за идните генерации – рече Заев.
фото: МИА
