Во врска со резултатите од суперанализите на Агенцијата за храна и ветеринарство за соините шницли и трошки увезени од Србија од „Виталиа“, попладнево се огласи компанијата која наведува дека Европската Унија дозволува минимум концентрација на ГМО храната и сè што е под 0,9 отсто се третира како Нон ГМО.
„Истото законодавство го има и Србија, поради што суровините кои се набавени од страна на нашата компанија се со спецификација согласно ЕУ регулативата и со потврда дека производите се произведени од генетски немодифицирана соја. Со новиот правилник во Македонија донесен пред три години, со кој се забранува какво било присуство на генетски модифицирани организми, Македонија се одалечува од европското законодавство што може сериозно да му наштети на стопанството“, соопшти „Виталиа“.
Компанијата посочува дека во корист на индустријата и потрошувачите ќе побара хармонизација со европското законодавство затоа што, како што наведува, Правилникот е неконструктивен и ваквите отстапувања само предизвикуваат паника кај јавноста.
