Сообраќајот на државните патишта се одвива по наместа влажни коловози, додека слаб снег провејува на Попова Шапка, меѓутоа не се здржува на коловозот, информира Автомото сојузот на Македонија (АМСМ) во извештајот за состојбата на патиштата во 18 часот.
Поради појава на магла видливоста е намалена до 50 метри на патниот правец Лисец-Попова Шапка и до 100 метри на Стража.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е појава на одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.
