Мора да се каже дека Република Македонија има специјално место на ова издание на Самитот на ЕУ за Западен Балкан. Со постигнатиот договор за македонско-грчкиот спор за името и за стратегиско партнерство со Грција, како и со датумот за преговори со ЕУ, нашата земја е препознаена како лидер во регионот од аспект на надворешната политика и билатералните прашања и наследство од минатото, изјави премиерот Заев по повод учеството на македонската делегација на Самитот ЕУ-Западен Балкан во Лондон.
– Начинот на кој нашата земја ги затвори отворените прашања со сите соседи е модел за успешна приказна што ја поздрави целиот демократски свет, и посебно нашите соседи и нашите партнери во Европската Унија – рече Заев.
Како што соопшти владината прес-служба, во оценката за учеството на ова издание на Самитот ЕУ-Западен Балкан, тој истакна дека станува збор за респектибилен собир кој оваа година беше посветен на регионалната економската соработка како суштински дел од интегративните процеси на ЕУ, на надворешната политика и билатералните прашања и наследство од минатото, како и на безбедносните прашања и миграциите, тема на која, вели, целосно е фокусирана ЕУ и сите останати европски земји.
Според него, на овој Самит дошла до израз уште еднаш определбата на сите земји во регионот да споделуваат европски ставови и вредности во однос на заедничко поврзување и соработка.
– Се договоривме дека нема да го пропуштиме моментот да учествуваме сите заедно во посилна Европа на политички, на економски и на безбедносен план. Владата на Република Македонија е фокусирана да обезбеди и да гарантира стабилна и мотивирачка средина и да биде кредибилен партнер за бизнис иницијативите што се отвораат на овие средби. Нашите следни чекори се насочени кон постигнување на ЕУ стандардите за регионална соработка и за економските политики, соодветно на големиот потенцијал на единствениот пазар на ЕУ – рече Заев.
Тој потенцираше дека еден од елемените за мотивирачка средина за бизнис иницијативите е и поканата Република Македонија да биде 30-та земја-членка на НАТО што ја очекуваме за ден-два во Брисел.
