Пилотот на Рено, Нико Хулкенберг беше најбрз во првиот дел од четвртиот тест ден од предсезонските подготовки во Формула 1 за 2018 година.
Германецот забележа најдобра обиколка со 1.22.507 минути, и беше за 0.282 секунди побрз од Валтери Ботас од тимот на шампионите Мерцедес.
Маркус Ериксон за тимот на Заубер беше трет со најмногу направени обиколки од сите на патеката „Каталонија“ – 69. Пјер Гасли од Торо Росо е четврти, а првите пет ги додаде младата ѕвезда на Ред Бул, Макс Верстапен кој, како и вчера, не се задржа долго на патеката и направи само 18 круга.
Белгиската надеж на Мекларен, Стофел Вандоорн работеше на различна програма и најбрзата обиколка беше доволна за шестото место.
Ѕвездата на Ферари, Себастијан Фетел исто не направи брза обиколка, иако забележа 37 круга. Неговото заостанување беше речиси десет секунди од лидерот.
