Општина Карпош и здружението на граѓани Центар за едукација и менаџмент во спортот (ЦЕМС) склучија Меморандум за соработка, во областа на промоција на спортот во општината како и едукација на младите спортисти.
Градоначалникот Стефан Богоев посочи дека локалната самоуправа е посветена на враќање на спортскиот дух во Карпош и идентификација на младите таленти.
– Постои вистински ентузијазам за системски пристап кон спортот на локално ниво. Поддршката од општината ќе биде неселективна и правилно распределена за сите клубови, поединци и училишта. Карпош има активни училишни лиги во фудбал, кошарка, одбојка и ракомет кои претставуваат одлична основа за нови проекти и надградба на талентот на учениците – рече Богоев.
Претседателот на ЦЕМС, пак, Бојан Захариев изрази задоволство и посочи дека Карпош е цела општина во Скопје со која потпишале меморандум. Целта, како што рече тој, е преку оваа соработка е да се зголеми интересот и масовноста на училишниот спорт и да им се даде патоказ на младите за нивен вистински напредок и развој.
Меморандумот предвидува активности за подобрување на дел од спортската инфраструктура во општината, стручна едукација за учениците и спортските работници, како и вмрежување со други институции и организации кои работат на подобрување на состојбите во спортот.
Инаку како што посочуваат од општината, Карпош веќе е во подготвителна фаза за изградба на еден реонски базен, како и формирање на нова, современа фитнес зона во Карпош 4. Станува збор за инфраструктурни објекти кои ќе може да ги користат и учениците од основните училишта, а рекреативно и сите граѓани на Карпош.
