Секоја реформа има своја цел. Но ниту една реформа неможе да стигне до посакуваната цел доколку не се потпира на суштинските претпоставки за нејзино реално спроведување и операционализирање. Во центарот пак на тие претпоставки секогаш се наоѓа човечкиот фактор или човечкиот ресурс – оние што треба да ги реализираат зададените задачи, оние заради коишто воопшто и постојат самите реформи, порача министерот за внатрешни работи Оливер Спасовски во обраќањето на работилница за планирање и управување со интегритет.
Работилницата е во рамки на Програмата за градење полициски интегритет што се спроведува во заедничка соработка на Женевскиот центар за демократска контрола на вооружените сили и Министерството за внатрешни работи.
Спасовски, потенцира дека без постоењето или градењето на личниот и професионален интегритет се губи смислата, односно есенцијата на каков и да е општествен зафат – неговата кредибилност и веродостојност.
– Може да имате беспрекорни идеи, проекти, концепти, процедури, но што од сето тоа доколку уште во самата основа сме пропуштиле да инвестираме во луѓето, и не само во нивната спобоност, стручност или експертиза, туку и во нивното професионално поводение, сфаќање, во нивниот етички и вредносен светоглед – рече Спасовски.
Според него, сосема е разбирливо зошто во изминатиот период, во рамки на Министерството за внатрешни работи, беше одлучено да се реафирмираат заложбите за креирање на квалитетна база на нови стандарди и вредности што ќе бидат во функција токму на воспоставувањето на повисоко ниво на професионален интегритет на сите вработени во министерството.
– Интегритет што, од една страна ќе ги гарантира поголемата ефикасност и доселедната законитост во работењето, а од друга страна ќе го почитува достоинството и професионалните квалитети на нашите вработени – истакна Спасовски.