Бројот на деца во детски градинки и центри за ран детски развој лани е зголемен за 2,6 отсто во однос на 2016 година. Во септември минатата година во овие установи за претшколско образование биле згрижени 35.286 деца, покажуваат податоците на Државниот завод за статистика.
Овие установи им обезбедуваат здравствена заштита, исхрана и дневен престој на децата, во согласност со нивните развојни потреби, на возраст до шест години, во повеќе групи и тоа групи деца во развоен период до две години, од две години до тргнување на училиште, комбинирани групи, групи на деца со пречки во развојот, групи на деца во центар за ран детски развој во состав на детска градинка и групи за вонинституционална форма на активност.
Со годишните извештаи во 2017 година се опфатени 99 установи за згрижување и воспитание на деца, што е за 3.1 отсто повеќе во однос на 2016 година.
