Убеден сум дека Договорот за името ќе донесе благосостојба за сите што се чувствуваат Македонци посебно во Грција поради тоа што тие и досега немале никакви придобивки, рече премиерот Зоран Заев на попладневниот дел од седницата за пратенички прашања во одговор на пратеникот од ВМРО-ДПМНЕ Зоран Илиоски и содржината на член 4 став 3 од Договорот за името со Грција.
Порано, дополни тој, имаше и ветувања за адвокати за враќање на имотите, но ниту една држава не може тоа да го направи бидејќи е недозволиво со меѓународните договори.
– Но, секако водењето грижа за својата дијаспора ќе биде членот којшто апсолутно ќе биде променет. Во најмала рака онака како што Грција води грижа за својата дијапсора, така и ние. Ќе направиме унифицираност поради тоа што сакаме да градиме пријателство и поради тоа што нашата тенденција е да бидеме полноправна членка на ЕУ – рече Заев.
Појаснувајќи го членот 4 од Договорот во однос на немешањето за националните малцинства, Заев рече дека од самостојноста досега Македонија не се мешала во заштита на страната на националните малацинства внатре.
– Немаме намера да се мешаме и да интервенираме во сувереноста на друга земја, ниту пак ќе дадеме некој кај нас да се меша, но истовремено нашите малцинства каде и да се во светот си ги имаат правата како што секое малцинство или дијаспора секаде во светот го има. Од тој апсект, адаптирањето на тој член се однесува за малцинства и ќе биде само универзален аспект на земјите членки на ЕУ. Најмалку ќе имаме тоа што Грција го има во својот Устав. Како таа води грижа за својата дијаспора. И ние тоа ќе го добиеме. Она што е останато од нашиот Устав води неколку чекори понатаму и може во иднина да предизвика одредени иритации, одредени нови проблеми, коишто не ни требаат. Тука треба да се следи духот на пријателството – рече Заев.
Појаснувајќи му ги на Илиоски причините зошто го променил ставот дека нема да се менува уставното име на државата Заев рече дека направил компромис во име на крупните одлуки за членството во НАТО и ЕУ како стратешките цели на државата.
Заев, меѓу останатото, нагласи дека е добро да се отвора дебата за суштинските делови од Договорот, со што граѓаните би го разбрале подобро за изјаснување на референдумот.
