Првпат по 2015 година Советот на ЕУ синоќа донесе одлуки за проширување, кои значат огромен чекор за европската перспектива на Македонија и Албанија, изјави бугарската вицепремиерка и министерка за надворешни работи Екатерина Захариева по состанокот во Луксембург на кој беше решено Скопје и Тирана да почнат преговори за членство во јуни 2019 година.
– Нема да кријам дека не беше лесно. Донесовме одлука исклучително добра за цела Европа, за Западен Балкан и за граѓаните во регионот. Ова решение не само што ја зголемува довербата во ЕУ, туку покажува дека ги исполнуваме обврските што ги преземавме кон граѓаните во овој регион, а европската перспектива на земјите од Западен Балкан не е само декларативна. Тоа е само почеток, процесот почнува допрва, има многу работа да се заврши – изјави Захариева која претседаваше на сосотанокот на Советот за општи прашања на ЕУ.
Според неа, заклучоците даваат многу јасна временска перспектива и конкретни одредници за двете држави – Македонија и Албанија.
Таа појасни дека процесот за почеток на преговорите може да стартува вообичаено 6-7 месеци по одлуката на Советот.
– Лично би сакала да видам похрабро решение, но синоќешното решение беше донесено исклучително тешко и означува огромен чекор кон европската перспектива за двете држави – наведе Захариева.
