Странските инвеститори во Македонија значат многу повеќе отколку само вработувања на работна сила и инвестирање, порача Штефан Петер, директорот на ЕВН Македонија и претседател на Советот на странски инвеститори при Стопанската комора на Македонија на денешниот хуманитарен гурмански хепенинг – Светски пикник, што се одржа во Градскиот парк во Скопје.
Тој посочи дека повеќе од 50.000 луѓе во Македонија се директно вработени во странските инвестиции и додаде дека задача на странските инвеститори е да произведат квалификувана работна сила.
– Токму затоа како странски инвеститори работиме на образување на работната сила преку најнови методи и програми кои се применуваат насекаде во светот – рече Петер.
Анета Трајковска од Стопанската комора на Македонија посочи дека особено се горди што странските директни инвестиции во земјава растат од година во година.
– Податокот од Народна банка на Република Македонија говори дека годинава странските директни инвестиции само во првиот квартал се поголеми од вкупните диретни странски инвестиции остварени во 2017 година – рече Трајковска.
Целта на хуманитарниот гурмански пикник е да се промовираат позитивните ефекти на странските инвеститори врз националната економија и да се претстави културата на земјите од каде што потекнуваат преку најавтентичните рецепти од нивните национални кујни и другите културни обележја, како и нивната корпоративна општествена одговорност во Република Македонија.
На хуманитарниот „Светски пикник“ можеше да се вкусат карактеристични рецепти од над десетина различни земји од каде што потекнуваат странските инвеститори во Македонија, а собраните средства ќе бидат донирани во хуманитарни цели.
