Македонија се издигна над политките на изолација и поделби, идентитетот е загарантиран, македонската иднина обезбедена, се вели во честитката на СДСМ по повод поштпишувањето на договорот за името.
„Преку Договорот се отвораат перспективите на Македонија за членство во ЕУ и НАТО. Ја обезбедуваме македонската иднина, стабилноста, сигурноста, економскиот развој и подобриот живот на сите наши граѓани.
Денеска е потпишан Договор којшто обединува и гради пријателство.
Конечниот Договор за решавање на спорот со Грција еднаш засекогаш го обезбедува и гарантира нашиот, македонски идентитет, кој веќе никој нема да може да го оспорува или негира. Македонски јазик, Македонци, Македонски, Македонец, Македонка, се обезбедени еднаш засекогаш.
Македонија веќе нема генерации за губење и затоа за овој Договор граѓаните ќе го имаат последниот збор.
На референдум, согласно законите и Уставот, граѓаните ќе кажат ДА за обезбеден и гарантиран македонски идентитет, ДА за целосна интеграција во ЕУ и НАТО, ќе кажат ДА за македонската иднина“, се вели во честитката на СДСМ по повод потпишувањето на договорот за името.
