Претставникот од УНИЦЕФ им се извини на жителите што досега не биле информирарни за создавањето на домот за деца со попреченост во рамки на кампањата.
– УНИЦЕФ ќе поддржи изградба на градинка – рече тој пред бучните демонстранти кои не му дозволуваа да се доискаже.
Жителите се заканија дека од септември нема да ги пуштаат децата на училиште. Тие бараат да дојде градоначалникот на Неготино, како и премиерот Зоран Заев.
– Сменете ја одлуката за пренамена на објектот. Ова ни беше гром од ведро небо. Никој ни на сон не можел да сони дека ова ќе се случи во нашето село. Ќе ви дадам еден хектар нива на крајот од селото за да изградите објект – ѝ порача еден жител на Царовска.
Царовска се обиде да биде конструктивна и рече дека треба да се најде заедничко решение за да се сместат три деца и да се отвори градинка. Таа вети дека ќе направи сѐ за Тимјаник да добие градинка.
Жителите негодуваат и поради тоа што домот ќе биде во близина на училиште и во близина на откупни центри.
