Со слушање на „бомби“ денеска во Кривичниот суд во Скопје почна ново рочиште за случајот „Траекторија“ на Специјалното јавно обвинителство, за изградбата на автопатските делници Миладиновци-Штип и Кичево -Охрид.
Во Судот, како што јави МИА, присутни се поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор за државни патишта Љупчо Георгиевски, кои се осомничени дека во 2012/2013 година ги пречекориле своите овластувања во постапката за избор на компанија за изградба на автопатските делници до Штип и Охрид и нанеле штета на буџетот на државата од најмалку 155.117.172 евра.
Снимените разговори што се пуштаат во судницата, а кои произлегуваат од незаконското следење на комуникациите, ги изнесува обвинителката Лиле Стефановска од СЈО.
Во досега преслушаните десетина разговори во судницата се слушаат разговори на Миле Јанакиески и Никола Груевски со соработници за тоа како течел процесот за изборот на изведувач и преговорите со кинеските компании.
-Кинезите доставија и официјална понуда за Миладиновци-Штип од 288 милиони евра, му вели Јанакиески на Груевски кој пак прашува – Дали е тоа многу?
Јанакиески му објаснува дека не е многу, бидејќи проценетата вредност била 250 милиони евра.
Јанакиески во еден од разговорите, како што јави „Фокус“, зборува и со тогашниот амбасадор во Кина, Оливер Шамбевски.
Во еден од нивните разговори, министерот го информира амбасадорот дека тука работата се средува и сега треба да оди во Кина, за да како што вели, потпише таму меморандум со главниот.
-Топ Миле, топ, извикува Шамбевски, додавајќи дека едвај чека да дојде во Кина, пишува „Фокус“.
Јанакиески зборува и со една машка непозната личност и раскажува дека многу убаво си поминале во Кина и дека сите ги научиле да пејат „Излези момче право на тераса“.
