„Јадро“ бара одговор од Владата за смената на Алаѓозовски

Асоцијацијата за независна културна сцена „Јадро“ побара објаснување од Владата по одлуката за смена на Роберт Алаѓозовски од позицијата министер за култура. Асоцијацијата смета дека во последната година започнале суштински реформи, предводени токму од актуелниот министер.

– Од потенцијалните кандидати на БЕСА за оваа минситерска позиција не слушнавме ништо за начинот на којшто ќе продолжат овие реформи. Сме загрижени во однос на континуитетот на овие процеси и овие реформски политики – вели Тодор Чаловски од Јадро, пренесе 24 Вести.

Според претставници на Асоцијацијата, мора да се има континуитет во реформите во овој ресор и дека и покрај некои грешки направени изминатата година, овој процес на реформи мора да продолжи. Министерот Алаѓозовски, пак, посочи претходно дека и да биде сменет од оваа позиција, ќе продолжат реформските политики во Министерството за култура.