По разводот сите останати имаат слободен пристап до нашите деца освен ние, родителите од втор ред, а ние имаме слободен пристап до сите останати деца, освен до нашите, рече во своето обраќање претставникот на Иницијативата за заедничко и одговорно родителство после развод, Наум Рибароски на денешната јавна расправа на седницата на собраниската Комисија за труд и социјална политика.
Од Иницијативата очекуваат едногласна поддршка од партиите во насока на измена на Законот за семејство бидејќи, како што рече Рибароски, нивно барање е надпартиско и е од интерес на сите нас и на нашите деца.
Измените кои ги предлага иницијативата имаат поддршка од канцеларијата на Народниот правобранител, од здружението „Пет до 12“, од стручни лица и голем број родители кои се лично засегнати со овој проблем.
На јавната расправа се пријавија голем број дискутантни а беа презентирани и резултатите од анализата на искуствата со заедничко родителство по развод и разделба од другите земји според кои психолошките и здравствените проблеми кај децата кои се гледаат подеднакво со двајцата родители, се приближни до оние од функционалните семејства а драстично се разликуваат од оние кои живеат во еднородителски семејства.
Своите искуства ги споделија и мајка која со својата ќерка се гледа само 4 дена месечно бидејќи толку ѝ одредил Центарот за социјална работа, татко чие дете е киднапирано и однесено во друга држава и не го видел 7 години, но слушнавме и позитивен пример за заедничко и споделено родителство после развод кој го сподели мајка која решила на своите ќерки да не им го ускрати правото да се гледаат и со својот татко. Иницијативата ја има поддршката и од стручната јавност, од присутните психолози и психотерапевти.
Јавната расправа продолжува, а на листата најавени за дискусии се уште многу дискутанти.
