Во Кривичниот суд во Скопје за денеска е закажано ново рочиште за предметот „Поткуп“ каде обвинет е премиерот Зоран Заев дека како градоначалник на Струмица барал поткуп за градежно земјиште од струмичкиот бизнисмен Иван Николов.
На денешното судско рочиште треба да се гледа скратената снимка што беше објавена на Јутјуб. Таа требаше да се пушти на претходното во понеделникот, но немаше технички можности. За снимката, премиерот рече дека таа што беше објавена на Интернет не е целосна како таа од ПИ мерките, односно дека објавената е сечена и извадена од контекст.
Тогаш Заев даваше исказ одговарајќи на прашањата на адвокатите, обвинителката и на судиите.
Тој рече дека во Струмица се градел најголемиот храм на Балканот, за кој неговата фамилија била најголем донатор.
– Моето семејство преку своите фирми беше прво што уплати пари на сметката за црквата. Донираа и најголем процент од градежните материјали, а јас како градоначалник лично од моја сметка уплатив пари за изградба на храмот – рече Заев.
Цената за продажба на државно земјиште, како што рече Заев ја одредува Владата и таквата одлука не зависи од општинските служби.
– Преку сите овие искази коишто се зедоа од мене како обвинето лице, од сведокот, гледањето на целосни видео снимки, онака како што постоеле, како и слушањето на телефонските разговори обезбедени од ПИ мерките и сите докази коишто ги дадовме во прилог, јас навистина очекувам да финишира овој процес онака како што ќе одлучи Судот и по ова јас очекувам ослободителната пресуда за овој предмет – изјави Заев по рочиштето.
Целосната снимка поради која Зоран Заев се товари за примање поткуп, беше пуштена на претходните рочишта во судницата без присуство на јавноста. Заев бараше снимката од ПИ-мерките да се пушти јавно, но Апелацискиот суд не го дозволи тоа. Според него, со емитување на скратената верзија од снимката му била нарушена честа и угледот.
Премиерот Зоран Заев е обвинет дека како градоначалник на Струмица побарал поткуп од 160.000 евра од бизнисменот Иван Николов Сачевалиев.
