„Тотал инжинеринг“ ги демантира информациите на претседателот на ВМРО-ДПМНЕ Христијан Мицкоски дека нивна механизација врши транспорт во РЕК Битола.
Во врска со изнесените лаги од Христијан Мицкоски, кои се однесуваат на наводна работа на механизација која е сопственост на „Тотал инжинеринг“ во РЕК Битола, ја известуваме јавноста дека единствената вистина е дека „Тотал инжинеринг“, водејќи се од принципиелни и објективни причини и со цел да оневозможи каков било конфликт на интерес при својата работа, неодамна изврши продажба на севкупната механизација (камиони, багери, ваљаци, булдожери и останато).
„Тотал инжинеринг“ нема никаков деловен однос со компанијата која Мицкоски ја наведува, во обид да конструира непостоечки лажен случај.
Затоа, уште еднаш потенцираме дека механизацијата на „Тотал инжинеринг“, ниту пред продажбата, ниту после тоа, не била и не е ангажирана во ниту една постапка во РЕК или во која било друга државна институција.
Лажните обвинувања на Мицкоски ги сметаме единствено за низок, непромислен и неуспешен обид на неговата партија да го извалка името на премиерот, неговите роднини и компанијата „Тотал“.
– За изнесените невистини ќе следува соодветна судска постапка, а во меѓувреме јавно ги повикуваме институциите (обвинителството и финансиската полиција), но и сите невладини организации кои се занимаваат со отчетност и транспарентност, да ги истражат детално обвинувањата на Мицкоски и јавно да се произнесат дали „Тотал инжинеринг“ има каква било индиректна или директна релација со евентуални тендери во државни или јавни институции – преку соопштение се огласи управителот на „Тотал инженеринг“ Вице Заев.
