Поранешниот министер Спиро Ристовски, обвинет во судскиот процес за 27 април во своите воведни зборови денеска рече дека Обвинителството за гонење организиран криминал и корупција го затворилo обвинението без тој да даде исказ.
На ова претходно се пожали и поранешниот претседател на Собранието, Трајко Вељаноски.
Ристовски тврдеше дека во периодот за кој му се препишува кривичното дело не бил на партиски функции, а и тоа дека немал никаква комуникација со Никола Бошковски кого не го ни познава.
– Првпат го видов на телевизија, а со Владимир Атанасовски само трипати службено сум комуницирал. Не сум имал комуникација со градскиот и со другите партиски комитети на ВМРО-ДПМНЕ. Со сведоци ќе докажам дека наводните пораки споменати во обвинителниот акт и не се испратени од моја страна. Критичниот ден не сум комуницирал со Богдан Илиевски-Бетмен. Не сум знаел што ќе се случи тој ден. Очекувам ослободителна пресуда за мене – рече Ристовски.
Фото: МИА
