Против оние лица кои го загрозиле јавното здравје и кои не ги почитувале мерките, препораките и апелите ќе бидат преземени сите мерки. Мора да се почитува мерката за самоизолација, а ќе преземеме најостри мерки на казнување. Максимално сум разочаран од однесувањето на некои наши колеги, нагласи на денешната прес-конференција во Владата, министерот за здравство, Венко Филипче, откако потврди дека со коронавирус е заразена нивна колешка, директорката на Клиниката за кожни болести во Скопје.
Епидемиолозите сега им влегуваат во трага на контактите на вработените и на пациентите, бидејќи пет дена докторката одела на работа по враќањето од ризичен регион од Северна Италија.
Филипче вели дека докторката, која е во стабилна здравствена состојба, сега прво ќе се лекува, а потоа ќе се размислува за санкции.
– Го имаме списокот на сите лица со кои докторката контактирала, а епидемиолозите ќе решат што понатаму за лицата кои биле во контакт со неа. Ова непочитување на препораките е огромно разочарување за нас, особено кога станува збор за медицинско лице. Мора да сме одговорни и кон колективното здравје, затоа апелите мора дa се почитуваат. Како Mинистерство сме целосно посветени на контрола и превенција од коронавирусот, тоа е приоритет, а мерките за заштита ги препорачуваме и тоа пред сите други во регионот. Не може да ги затвориме границите, тоа е невозможно и СЗО не го препорачува, а мерката самоизолација уште пред две недели ја препорачавме. Апелирам секој којшто се враќа од ризичен регион, и да нема симптоми мора да остане во автоизолација 14 дена најмалку – додаде Филипче и повторно изрази огромна благадарност до медиумите за коректното известување.
