Апелациониот суд во Скопје одлучи видео-снимката прибавена со Посебни истражни мерки за случајот „Поткуп“ во кој обвинет е премиерот Зоран Заев, да се гледа зад затворени врати односно јавноста да биде исклучена.
Ова значи дека Апелација ја прифати жалбата на Основното јавно обвинителство за гонење на организиран криминал и корупција од каде ја поднесоа откако претходно Кривичниот суд одлучи снимката да се пушти во судница во присуство на јавноста.
Заев и неговите адвокати уште од почетокот на судскиот процес инсистираа новинарите и останатата јавноста да бидат присутни во судница кога ќе ја пуштат снимката за да можат граѓаните да имаат свој впечаток за тоа што се случувало и за што всушност се разговарало. Меѓутоа, со одлуката на Апелациониот суд, желбата на премиерот нема да се оствари.
Дел од снимката беше објавена во 2015-та кога Заев јавно ги објавуваше „бомбите“, ноќта кога беше организирано објавување на разговорите во Универзална сала. Заев од тогаш тврдеше дека снимката не е целосно објавена и е извадена од контекст.
Премиерот е обвинет дека во времето кога беше градоначалник на Струмица барал поткуп од 160.000 евра од бизнисменот Иван Николов – Сачавалиев за да му легализира градежно земјиште.
Покрај снимката постојат и телефонски разговори прибрани со ПИ-мерки кои додека се пуштаа во судница, исто така, јавноста беше исклучена.
