Неуспешен почеток за македонската кошаркарска репрезентација во квалификациите за евро-шампионатот 2021. Избраниците на селекторот Александар Тодоров вечерва во СЦ „Борис Трајковски“ се поразени од Естонија со 72:81.
Гостите уште од самиот почеток тргнаа со 0:6 и покажаа дека во Скопје се дојдени по двата бода. „Црвено-жолтите“ постојано го бркаа резултатот, но најмногу што сторија е доближувањето до минус два (16:18) на една минута пред крајот на првата четвртина која им припадна на Естонците со 16:20. Следуваа тешки 10 минути за македонските кошаркари кои во вториот период постигнаа само пет поени, а примија 25 за на пауза да се отиде со резултат 23:45.
Играта на почетокот на второто полувреме донесе надеж кај три и полилјадната публика дека може да се случи резултатски пресврт. Разликата од 22, падна на 10 по само шест минути (43:53), но Естонците направија серија од 5:0, за по 30 минути резултатот да биде 46:60.
Последниот период гостите го отворија со тројка за високи +17, а двоцифрената предност ја одржуваа до 35.минута кога Македонците намалија на 62:70 и тоа е се што сторија на овој меч.
Најефикасен во нашиот тим беше Војдан Стојановски со 26 поени, во победничката селекција, водено и на натпреварот најпрецизен беше Кристијан Куламае со 31 поен.
Во другиот натпревар од 1. коло во Б-групата од квалификациите за ЕП, Италија вечерва е домаќин на Русија.
